一夢人間四十年 — 恥笑青蛙
係，好無聊。本文內容就係有如標題。此人既來歷就不贅，但大概就係我響呢間公司返幾耐工，此人就跟住我搵食有幾耐。認真的，都算係好食好住，一年去三次日本、五次台北、偶爾仲去下桂林、上海、三藩巿，Google I/O佢地都有份現場觀摩最新科技。
看倌，唔好話你老闆有冇帶你去咁多地方啦，連請咁多假都未必批啦！（而我唔會，我批假係緊閉雙眼係咁批的）
還記得有一次係秋葉原買左兩對鞋俾佢，咁旅行完畢返工就當然要對鞋出黎裝下B，我就兩千円（咁上下，唔記得幾錢）一對買俾佢呀！隨時貴過人著既鞋。然後有大陸既女同事心算一下，話「真係貴過我果對。」
多年來，有人話我白痴，有人話我當左隻蛙係自己個仔，有人話我同佢越來越似樣。我當然知道呢啲睇法點黎，但我覺得真係錯左重點。
係，做人好難。所以你總得有啲野係每當自己唔開心既時候，可以令自己開心返啲。
從小以來，每逢有乜野好唔高興既時間，我既做法就係大覺瞓。但慢慢呢招就冇乜辦法。一黎，大佬而家唔係成日可以大覺瞓架嘛，好忙的。二黎，就係有時未必係有乜大獲野搞到心情好差，但就好多唔多順心既野，你要去處理。總得有一啲比較有時間成本效益既方法去放善心情。
冇錯，其實音樂都可以的。
"Old time rock and roll~That kinda music just soothes the soul~"
尤其是Judy and Mary，一來JAM有一堆早期Punk Pop走「可愛」路線既歌，二來Yuki既高吭既童音就當然有「好正面」既特色。絕對唔係「越聽越慘」果啲。（亦證明我唔會係果啲失戀就去聽慘情歌既人啦下）
但，係個袋潛隻青蛙出來望下，就會改善到心情，你話係咪比音樂更加方便有效？耳機都唔駛戴！Emotional support公仔，方便過你養貓養狗添。
係，好大鑊。玩下玩下，就唔止一隻青蛙，仲多左一班鳥添。
認真的，不能否認，起初就係陪女玩。但後尾其實好明顯，係我自己鍾意玩公仔。Why not？幾十歲大男人就唔可以玩公仔，一定要玩女人、玩車、玩Hi-Fi？Why not both？等等，「我都冇車牌，亦唔玩Hi-fi。」「咁即係⋯⋯」「我冇講過。」
認真的，如前文，我同 Ivan Li 李聲揚 -君子馬蘭頭 網上識左都好耐，即係由我做佢CD-ROM，到係啲德蟲群組到「認識」，到我冇再睇Newsgroup，但及後係其他平台相認返，一直都冇見過。重點係，我份人比較深閨，唔係好出街亦比較怕生保（後生果陣，而家都仲有少少既）。
但2018年9月，咁啱我就出差去台北，佢又唔知乜野事去台北（搞移民之類吧，佢仲做台灣新住民做到有報紙訪問），就黎左個世紀推聚去食飯（好似真係識左差不多廿年第一次見面？）。
平時我去台北呢，一般蛙係同懶得鳥去既。但呢一次知道會有勞蘇同小企鵝出席，我就特登帶胖企鵝去見下啲親戚！
又講開，我地做人做事，就好有規矩既。去台北就帶懶得鳥、落雪就帶胖企鵝、去睇秀吉就帶秀吉。
係，好無聊，我知。但事實上，近呢7、8年，蛙與鳥係我人生中實在非常重要。真心的！我早排咪返左大陸既，淨係帶左蛙去。而我係真係好擔心屋企啲鳥！差不多兩個月之後返去，見佢幾條友冇穿冇爛我真係放下心頭大石！
人生好難，人亦唔係真係咁可靠，「而呢班友應該仲忠誠過你很感激既忠誠的狗。」
IG: @cschingwah
