一夢人間四十年 — 岩布仙尼
人係善忘既，好多野都會隨風而逝。而人亦都係善變既—La donna è mobile，而其實人甚至比女人更善變（？）。如果你問以前既我知唔知自己40歲會係點，10歲既我可能會答你「我唔知。」20歲既我可能會答你「鳩知。」30歲我可能會同你講「係間小公司做廢老指點江山。」
見到嘛？我初中時我係唔講粗口既，高中就已經直迫地盤佬級。
人係好善變的。
而我一直都係唔鍾意飲酒既，連啤酒都係可免則免；但而家就學人學飲威士忌添，冇野做就自己係屋企飲下。
人真係好善變。
30歲左右，其實我都好希望搵到份工係可以relocate既，差不多每逢係relocate既工我就會面（亦曾經有兩次機會出現過，但最後一次因為已經offer就冇去見，另一次就變左投共）。但而家香港人既移民潮下呢？我就比較50/50了。Michigan seems like a dream to me now.
屌你人係咪真係好善變呢？
好過癮既。講啲比較個人少少既野，筆者今年仲係單身嘛，而我第一次甩拖時，同某某當時相熟既姨姨講，佢居然話「吓？乜你會拍拖架咩？」真係Don’t talk of love but I’ve heard the word before。
當時我當然表示反對，人人跑步點解我唔可以跑？人人去做Gym點解我唔可以做？但事實上，人地睇你個咁既款，都睇死你唔會去跑步唔會去做gym，自有其原因啦。真係對我稍有了解既人都知，感情事甚至去到基本社交，本人係有幾被動，有幾咁唔積極。不過，人係會變既，someday突然開始捧住個大肚腩去跑步又有幾奇？
而且我2018年的確有開始做下gym！
Anyway，善惡到頭終有報，各有前因莫羨人。人係善變既，但有啲野就始終都係好難去改變。
What we talk about when we talk about love?
我而家都經常荼毒我啲後生既前馬仔，唔好俾你屋企左右你。唔好覺得出黎做野就係要即刻搵個女友，25歲就要結婚30歲就要抱倆（大陸嘛，有邊個同屋企稍稍關係良好既女仔，唔係24歲時已有男友就不停被催婚、未有男友就係好多睇要去相？男仔呀，26掛），你既人生係你自己既，唔係你老母既。
另一樣野我又係成日同啲「搵真愛」既同事講。真愛就即係不計回報無條件既付出，但你同時要記住人係自私既，對方就算都當你係「真愛」，都會成日被自己眼前既利益、所得既回報，唔記得左要無私既。包括埋你老豆老母都係。
看倌，唔好講我既睇法啱唔啱，個人意見姐，lowest form of human knowledge。
但呢一切，其實都幾肯定係同成長既經歷有關。Childhood is what you spend the rest of your life trying to overcome。不惑之年，先唔好講過去咁多年我有乜經歷、改變。但2021年1月1號，我一個人係辦公室飲左支同事送、放左係公司好耐既芝華士酒版（話多謝我幫左佢一把。我都話我做野既宗旨，就係先伸出友誼之手，先與人為善），一邊聽The Cranberries聽到痛哭流涕（放心，大陸都係紅日黎，放假既公司冇人。我仲係去香蜜湖做完檢測返去公司坐下大大聲聽下歌⋯⋯Well，我做邊行？大把喇叭可用），直到我而家寫完呢個唔知點解要寫既系列，既少少感悟。
當然要話我成長經歷，講到自己幾慘，真係唔好痴線，我老豆老母錫到我燶，圍頭人喎，我得一個家姐一個妹喎。而我亦唔係同屋企一早就關係好差。但係人與人之間既關係，就並唔係「真愛」咁間單，有啲野發生左就係發生左，係好現實既。如果你對李佳芯係「真愛」就可以，「Ali咪好唔得閒？你估你無私付出訂架雪車今晚就一定會去你屋企呀？Ali都有Ali自己想要既野的。」
算喇，太個人既野就唔想再講太多（屌，但其實已經講左太多）。
成日俾人話，「下？冇架喇？」
係，呢篇文係，連呢個系列都係，冇一個好好既完結。屌，咁原則上都仲有下半場架嘛，上半場完求其，下半場出黎早啲企穩陣腳玩好啲咯。
呢個系列，真係如序所言，到我8月1號先發現自己要同3字頭講再見先開始想寫。「而且大家知我有幾忙架啦？跟本我今晚就係應該響到睇合同、寫proposal，而唔係發酒瘋亂咁講野。」
不過吊頸都要抖下氣，吊蟹都要回下氣啦下。又Medium其實我本身冇諗住寫到個人日記咁。不過，事已至此，是但。
