一夢人間四十年 — 生命中不能承受的輕
我就當然唔係要同大家講米蘭昆德拉啦。不過，我係的確有睇過《生命中不能承受的輕》既，中譯啦下。其實唔止，我仲有睇過《笑忘書》，不過其實就僅此而已。
筆者從來都唔係一個文青，從小就係一個冇乜自由亦冇乜資源既環境長大，唔係話我父母窮定唔肯花錢係我身上，而係冇俾到自由我（及我家姐、細妹）。簡單來講，就係傳統「管教」式既家長，「阿媽邊會話錯你」、「聽阿爸講就啱架喇」果種。簡而言之，就係乜都老豆老母幫你揀埋。
所有，想要乜想學乜，都係要睇下老豆老母俾唔俾你。記住喎，我小學係斗零零用錢都冇，亦唔比出門口。簡而言之，「我老豆老母係唔識訓練仔女，只會管、教、鬧、打仔女果種」，我細個係冇乜「物理自由」，亦冇「維他命M自由」，亦冇人會陪養我，因為「最緊要讀好啲書大個搵多啲錢」。
係呢種從少冇乜選擇既情況下，細個其實亦冇乜陪養到乜特別興趣。我細個係因老豆既意志而有學電子琴，但就越被迫越冇心學，跟本唔會練（不過學到既樂理對我以後既自學貝司相當有用）。其他，從細其實都係打下機、睇下電視咁。然後就係我老豆有一排買啲書我睇下咁，所以我係睇三國、水滸、西遊，七俠五義就睇到去續小五義。（金庸倒要自己中學時借書睇）
而我小學雖然完全唔溫書，連考試都唔會溫，但我記性好，好多時亦睇埋我家姐啲教科書，小學成績都仲係好好既，但成績就換唔到自由。去到初中呢，在學校時間多左人亦長大左，就多左啲自由。多左踢波，多左打籃球，可以落街，開始有有線，幾時都有波睇、有YMC，又開始有零用⋯⋯
雖然錢仍然係有限，但起嘛我可以選擇，亦知自己有乜選擇。
我初中既零用錢，主要用係以下幾個地方：
- 買CD
- 買Game
- 買Jumpshoot、進攻足球等體育雜誌（新一代唔知係乜黎架喇）
- 俾PNETS（新一代唔知係乜黎架喇）
尤其是俾PNETS上網呢樣野，當然就係打開新世界大門。
先唔好講我俾到新認識朋友既形像係乜，但我肯定當中，好大部份係源自我聽過既音樂以及睇過既書。呢篇文寫左咁耐，其實就係想講我睇過既書。
前文有講，我小學就睇過一系列既中國古典小說。而因為我既興趣，我估唔難想像，我係睇下好多有關音樂、搖滾歷史、日本文化及歷史既書。而小說，當然就睇唔少司馬遼太郎、山田風太郎等既日本歷史或奇幻小說。
但同本人唔搭調既，就係本人其實都睇過好一堆歐美既古典小說！大佬，我呢啲行出黎最多都只可以係偽文青啦，點解咁無厘頭會去睇埋啲米蘭昆德拉、少年維特的煩惱、西線無戰事、美麗新世界等等等等既書呢？
答案，就係我有生活於網上，然後就從當年 Ivan Li 李聲揚 -君子馬蘭頭 既新聞組入面做CD-ROM，睇佢寫既文，睇佢地啲文青對話，於是我又東施效顰學人睇下呢啲歐美文學。以至我之後修過一課Eng Lit，成績都還不錯的。又，裝個逼先，我記得當年有一位相熟既同學副業就係爬格子，有一次功課要分析一篇short story，我就隨口噏左幾句。之後大家返黎再傾，佢話「喂你係咪識架？我之後搵書講呢篇野，同你講果啲一樣架喎。」「嘻嘻，係咩？」
認真的，我當然唔係乜野文青，文學既野我真係唔多識，亦談不上博覽群書。但先唔好講咩偽文青、咩係啲女面前裝逼，我今日係一個咁樣既人，除左家庭以及人生經驗，我相信早年睇過既書，係同我聽過既歌，係相當有關係既。就例如，令我將人際關係都睇得好輕，輕輕放下任何一段關係，而唔會覺得可惜。我而家連我老豆老母都可以當唔認識既人咁（最奇特係冇乜鬧文既，但，你會唔會同塊玻璃鬧交？），你於我黎講有冇野親得過佢地先？（「都唔知同《生命中不能承受的輕》有乜關係」。但，屌，日本歷史同陶安仁又好有關係咩？）
所以？無可否影我係受到埃汾影響，「先會有今日咁平凡」。Anyway，當年口號係：
「睇斷浪谷，比別人知得多。」
而家呢，李聲揚已經有Patreon可以訂閱喇。（非要邀功，但「狼耳街華人」呢個名，我都有啲貢獻！而又，本文既非葉佩雯，亦非業配文。但講到踏入不惑之年既今日，我點都要提一提埃汾的）
